Date: 03/December/2018
នៅចុងខែវិច្ឆិការនិងដើមខែធ្នូនេះ មានការកើនឡើងនៃករណី ជំងឺគ្រុនឈាមលើកុមារ និងមនុស្សធំ (ព្រោះជាខួបកើនឡើង នៃជំងឺគ្រុនឈាមរៀងរាល់ ៤ ទៅ ៥ឆ្នាំម្តង) ដែលបណ្តាលឲ្បបណ្តាខេត្ត រាជធានីបាននចាត់វិធានការ បាញ់ថ្នាំសំលាប់មូសខ្លា និងបើកយុទ្ធនាការដាក់ថ្នាំអាបែតបន្ថែម និងអប់រំសុខភាព ។ ដូច្នេះដើម្បីបង្ការ កុំឲ្យផ្ទុះជំងឺគ្រុនឈាម ក្នុងតំបន់បងប្អូនរស់នៅ សូមបងប្អូនចូលរួមទាំងអស់គ្នា ក្នុងការបំបាត់ជំរកដង្កូវទឹក ក្នុងផ្ទះ ជុំវិញផ្ទះបងប្អូន ទីសាធារណៈនានា និងក្នុងវត្តអារាម ការពារកូនកុំឲ្យមូសខាំ ដោយពាក់ខោអាវគ្របជិតខ្លួនកូន ពាក់ស្រោមជើង គេងក្នុងមុងជានិច្ចទាំងពេលថ្ងៃនិងពេលយប់ ។ សូមបងប្អូននាំកូនទៅមន្ទីរពេទ្យ ជាបន្ទាន់ បើឃើញកូនក្តៅខ្លួនខ្លាំង ផ្តល់ថ្នាំមិនចុះកំដៅ ឬសង្ស័យថាមានជំងឺគ្រុនឈាម ។ រោគសញ្ញាជំងឺគ្រុនឈាមរួមមាន គ្រុនក្តៅ ខ្លាំង ឈឺក្បាល ឈឺក្រោយរង្វង់ភ្នែក ឈឺពោះ ក្អួត និងករណីខ្លះមានកន្ទួលក្រហមលើស្បែក ឬសញ្ញាហូរឈាម ។ បើបងប្អូនឃើញជំងឺគ្រុនក្តៅច្រើន ខុសធម្មតាក្នុងភូមិ ក្នុងមូលដ្ឋានរស់នៅរបស់បងប្អូន សូមផ្តល់ពត៌មានទៅមន្រ្តីសុខាភិបាល នៅជិតបងប្អូនបំផុតជាបន្ទាន់ ឫរាយការណ៏តាមលេខទូរស័ព្ទ 115 ដោយមិនគិតថ្លៃពីគ្រប់ប្រព័ន្ធ ដើម្បីឲ្យមន្ត្រីជំនាញចុះឆ្លើយតបជាបន្ទាន់ ៕
Date: 26/November/2018
នាយកដ្ឋានប្រយុទ្ធនឹងជំងឺឆ្លង កំពុងប្រារព្វសប្តាហ៏ប្រឆាំងនឹងភាពស៊ាំ របស់ឱសថទៅនឹងមេរោគ នៅមន្ទីរសុខាភិបាល ខេត្តកំពង់ចាម ។ សារសំខាន់ៗរួមមាន ៖ មិនត្រូវប្រើឱសថសំលាប់មេរោគ នៅក្នុងជំងឺស្រាលធម្មតាដូចជា ក្តៅខ្លួន ផ្តាសាយ ឈឺក្បាល រាក របួសតិចតួច និងលេបបង្ការចំលងរោគឡើយ ។ ពិភពលោកយើងនេះ កំពុងប្រឈមទៅនឹងការគ្មាន ឱសថសំលាប់មេរោគ ដោយសារវាមានភាពស៊ាំ ដែលបណ្តាលអោយព្យាបាលមិនងាយជា និងអស់ថវិកាច្រើនក្នុងការព្យាបាល និងបង្កអោយបាត់បង់ជីវិត ដោយសារមិនអាចសំលាប់មេរោគបាន ។ ដូច្នេះមិនត្រូវប្រើថ្នាំសំលាប់មេរោគ ដោយគ្មានវេជ្ជបញ្ជារ និងមិនត្រូវផ្សំថ្នាំ នៅឱសថស្ថាន ឬកន្លែងលក់ថ្នាំដើម្បីព្យាបាលខ្លួនឯងឡើយ ៕
ពត៌មានបន្ថែមសូមទាក់ទងទូរស័ព្ទ ១១៥។
Date: 26/November/2018
ពិភពលោកយើងនេះ កំពុងប្រារព្ធ សប្តាហ៏ប្រឆាំងនឹងភាពស៊ាំ របស់ឱសថទៅនឹងមេរោគ ។ មិនត្រូវប្រើឱសថសំលាប់មេរោគ នៅក្នុងជំងឺស្រាលធម្មតាដូចជា ក្តៅខ្លួន ផ្តាសាយ ឈឺក្បាល រាក របួសតិចតួច និងលេបបង្ការចំលងរោគឡើយ ។ ពិភពលោកយើងនេះ កំពុងប្រឈមទៅនឹង ការគ្មានឱសថសំលាប់មេរោគ ដោយសារវាមានភាពស៊ាំ ដែលបណ្តាលអោយព្យាបាលមិនងាយជា និងអស់ថវិកាច្រើនក្នុងការព្យាបាល និងបង្កអោយបាត់បង់ជីវិត ដោយសារមិនអាចសំលាប់មេរោគបាន ។ ដូច្នេះមិនត្រូវប្រើថ្នាំសំលាប់មេរោគ ដោយគ្មានវេជ្ជបញ្ជារ និងមិនត្រូវផ្សំថ្នាំនៅឱសថស្ថាន ឬកន្លែងលក់ថ្នាំដើម្បីព្យាបាលខ្លួនឯងឡើយ ៕
ពត៌មានបន្ថែមសូមទាក់ទងទូរស័ព្ទ ១១៥
Date: 21/November/2018
បងប្អូនជនរួមជាតិទាំងអស់ កំពុងចូលរួមពិធីបុណ្យអុំទូក បណ្តែតប្រទីបនិងសំពះព្រះខែ សូមដាស់តឿនដល់បងប្អូនប្រុងប្រយ័ត្ន ក្នុងការទិញ ស្រាមកពិសារ ត្រូវទិញស្រាស មានប្រភពច្បាស់លាស់ មានការត្រួតពិនិត្យត្រឹមត្រូវ ពីមន្រ្តីជំនាញ និងពិសារក្នុងកំរិតតិចបំផុត ។ យោងតាមទិន្នន័យ ការពុលស្រាកន្លងមក នៅតែជាបញ្ហាប៉ះពាល់សុខភាព និងអាយុជីវិត ។ សូមបងប្អូនមើលតួលេខ ធ្លាប់ពុលស្រាកន្លងមកដូចខាងក្រោម ៖
- ក្នុងឆ្នាំ ២០១៥ : ចំនួនករណីពុលស្រាមាន ២៨៤ ករណី ក្នងនោះស្លាប់ ៣៣ នាក់ កើតឡើងនៅក្នុងខេត្តចំនួន៣គឺ: ត្បូងឃ្មុំ ក្រចេះ និងមណ្ឌលគីរី ។
- ក្នុងឆ្នាំ ២០១៦: ចំនួនករណីពុលស្រាមានចំនួន ៩២ ករណី ក្នុងនោះស្លាប់ ១៥ នាក់ កើតឡើងនៅក្នុងខេត្តកំពងលឆ្នាំង។
- ក្នុងឆ្នាំ ២០១៧ : ចំនួនករណីពុលស្រាមានចំនួន ១៣ករណី ក្នុងនោះស្លាប់២នាក់ នៅខេត្តមណ្ឌលគីរី
- ក្នុងឆ្នាំ ២០១៨: ចំនួនករណីពុលស្រាមានចំនួន ២០៣ករណី ក្នុងនោះស្លាប់៩នាក់ នៅខេត្តក្រចេះ និងកំពត
ដូចនេះស្រា នៅតែជាមូលហេតុសំខាន់ ក្នុងចំណោម ការពុលអាហារជាច្រើន ដែលប្រជាពលរដ្ឋ កំពុងតែប្រឈមនឹងការឈឺ និងស្លាប់ ទោះជាយ៉ាងណា ក្រសួងសុខាភិបាលនៅតែប្រឹងប្រែង សហការជាមួយក្រសួងពាក់ពន្ធ័ ដើម្បីរៀបចំស្ពតផ្សព្វផ្សាយ អប់រំប្រជាពលរដ្ឋ អោយយល់ដឹងពីហានិភ័យ ដែលបណ្តាលមកពីការទទួលទានស្រា ។
ពត៌មានបន្ថែមសូមទាក់ទងលេខ ១១៥
Date: 17/November/2018
សូមបងប្អូនប្រុងប្រយ័ត្នជានិច្ចអំពី ការចំលងជំងឺផ្តាសាយបក្សី ។ សូមកុំយកមាន់ ទា ឬសត្វបក្សីឈឺឬងាប់ មករៀបចំជាអាហារ ត្រូវអនុវត្តអនាម័យក្នុងការបោចរោម និង ចំអិនជាប់ជានិច្ច ។ ក្នុងប្រទេសយើងជំងឺផ្តាសាយបក្សី បានឆ្លងពីសត្វបក្សីមកមនុស្សចំនួន ៥៦ករណី ដែលក្នុងនោះ ៣៧ករណីបានស្លាប់ ។ ដោយឡែកគ្រាន់តែឆ្នាំ ២០១៣ មានឆ្លងលើមនុស្សចំនួន ២៦ករណី ដែលក្នុងនោះមាន ១៤ករណីបានស្លាប់ និង ក្នុងដើមឆ្នាំ២០១៤ មាន ៩ករណី និង ៤ករណីបានស្លាប់ ។ បុគ្គលដែលមានរោគសញ្ញាគ្រុនក្តៅ លើសពី ៣៨.៥ អង្សារសេ និងមានរោគសញ្ញា ក្អក ឬ ឈឺក ឬ ដកដង្ហើម ហត់ និងមានប្រវត្តិប៉ះពាល់ជាមួយបក្សីឈឺ ឬងាប់ ក្នុងកំឡុងពេល ៧ ថ្ងៃមុនចេញរោគសញ្ញា ចាត់ទុកថាជាករណីសង្ស័យ ត្រូវបញ្ចូនអ្នកជំងឺ ទៅមណ្ឌល់សុខភាព ឬមន្ទីរពេទ្យជិតបំផុតដើម្បីធ្វើការព្យាបាល ។ ពត៌មានបន្ថែមសូមទាក់ទងទូរស័ព្ទទាន់ហេតុការណ៏ របស់ក្រសួងសុខាភិបាលលេខ ១១៥ ។ សូមទស្សនាភាពយន្តខ្លី អំពីសារអប់រំអំពីការបង្ការជំងឺផ្តាសាយបក្សី ជូនភ្ជាប់មកជាមួយនេះ ។
