Date: 29/Nov/2016

នាព្រឹកថ្ងៃទី២៩​ ខែវិច្ឆិកា​ ឆ្នាំ២០១៦​ ឯកឧត្តមវេជ្ជបណ្ឌិត ម៉ម បុ៝នហេង រដ្ឋមន្ត្រីក្រសួងសុខា​ ភិបាល​ បានអញ្ជើញចូលរួមជាអធិបតីក្នុងពិធី​ បើក​អង្គសន្និសីទវិទ្យាសាស្រ្ត សំរាប់ពីរតំបន់ប៉ាសីហ្វិកខាងលិច និងអាស៊ីអាគ្នេយ៍​លើកទី ៨​ ដែលកំពុងប្រព្រឹត្តទៅនៅសណ្ឋាគារអប្សារាបាលេសខេត្តសៀមរាប​ ដោយមានការចូលរួមពីលោកជំទាវអភិបាលរងខេត្តសៀមរាប​ លោកវេជ្ជបណ្ឌិត Liu Yunguo ​តំណាងអង្គការ​សុខភាពពិភពលោកប្រចាំនៅកម្ពុជា​លោក​បណ្ឌិត Alden Henderson តំណាងមជ្ឈមណ្ឌលប្រយុទ្ធនឹងជំងឺសហរដ្ឋអាមេរិក USCDC​ លោកវេជ្ជបណ្ឌិត Dionisio Herrera​ ប្រធានអង្គការ TEPHINET​ និងថ្នាក់ដឹកនាំ-មន្ត្រីក្រសួងសុខាភិបាលផងដែរ។

អង្គសន្និសីទវិទ្យាសាស្រ្ត សំរាប់ពីរតំបន់ប៉ាសីហ្វិកខាងលិច និងអាស៊ីអាគ្នេយ៍លើកទី ៨ ដែលប្រព្រឹត្តទៅចាប់ពីថ្ងៃទី ២៨ ខែវិច្ឆិកា ដល់ថ្ងៃទី ២ ខែធ្នូ ឆ្នាំ​២០១៦ នេះ​ មានគណៈប្រតិភូ​ប្រមាណជា​ ៣០០នាក់ អញ្ជើញមកពីទ្វីបអាស៊ី អឺរ៉ុប អាហ្រ្វិ​ក អូសេអានី និងទ្វីបអាមេរិក​ ចូលរួមដែលនេះជាវេទិកាដ៏មានសារៈសំខាន់ ដែលអ្នកអេពីដេមីសាស្រ្តអាចចែករំលែកនូវព័ត៌មាន រវាងតំបន់នានា តសូ៝មតិដើម្បីឱ្យមានការវិនិយោគ រៀនសូត្រអំពីការអភិវឌ្ឍន៍វិទ្យាសាស្រ្តថ្មីៗ និងចែករំលែកនូវបទពិសោធន៍នានា រួមមានការលំបាក និងឱកាសនានា រួមបញ្ចូលទាំងវិធីសាស្រ្តនានា ដើម្បីពង្រឹងបណ្តាញបណ្តុះបណ្តាល ផ្នែកអេពីដេមីសាស្រ្ត និងមុខវិជ្ជាពាក់ព័ន្ធនានា។ ការចូលរួមរបស់គណៈប្រតិភូមកពីតំបន់នានានៅក្នុងពិភពលោក បន្ថែមនូវគុណតំលៃចំពោះអង្គសន្និសីទ និងផ្តល់ឱកាសសំរាប់រៀនសូត្រ និងផ្លាស់ប្តូរព័ត៌មានឲ្យគ្នាទៅវិញទៅមក។

ក្នឱកាសដ៏ថ្លៃថ្លានេះ​ ឯកឧត្តមរដ្ឋមន្ត្រីក្រសួងសុខាភិបាល​ ម៉ម​ ប៊ុនហេង​ បានថ្លែងថា៖​
ខ្ញុំសូមសំដែងនូវអំណរគុណដោយស្មោះស្ម័គ្រចំពោះគណៈកម្មការរៀបចំសន្និសីទនូវកិច្ចប្រឹងប្រែងនានា ធ្វើឱ្យព្រឹត្តិការណ៍នេះកើតមានឡើង ជាពិសេសអង្គការ Safetynet, Telphinet និង Skoll Global Threat Fund ដែលបានផ្តល់ជំនួយទាំងបច្ចេក​ទេស និងថវិកាចំពោះសន្និសីទ និងចំពោះមជ្ឈមណ្ឌលប្រយុទ្ធនឹងជំងឺសហ​រដ្ឋអាមេរិក US-CDC អង្គការសុខភាពពិភពលោក អង្គការ FAO និងដៃគូដ៏ទៃទៀត ដែលខ្ញុំមិនបានរៀបរាប់។ ខ្ញុំសូមសំដែងនូវការគោរព និងការកោតសសើរអស់ពីដួងចិត្តចំពោះវាគ្មិននានានៃសន្និសីទ ដែល​បានចំណាយពេលវាលាដ៏មានតំលៃចូលរួម និងញាំងឱ្យព្រឹត្តិការណ៍កាន់តែអធិកអធម។​ ពិភពលោក កាន់តែខិតជិតគ្នា តាមរយៈការកើនឡើងនៃជើងហោះហើរ និងការរីកចំរើននៃសេដ្ឋកិច្ច ការកើនឡើងនៃប្រជាជន ការប្រឈមយ៉ាងជិតស្និទរវាងមនុស្ស និងសត្វ និងការផ្លាស់ប្តូរនៃអាកាសធាតុ បានជះឥទ្ធិពលទៅលើបរិស្ថាន និងសុខភាព ដែលជាកង្វល់សុខភាពសាធារណៈនៃការកើនឡើងនូវហានិភ័យនៃការរាតត្បាតនៃជំងឺកើតឡើងថ្មីៗ។ ពុំមានប្រទេសណាមួយ នៅក្នុងពិភពលោកអាចដោះស្រាយចំពោះគ្រោះបន្ទាន់សុខភាពសាធារណៈ ដែលប្រកាសអាសន្ន និងចេះតែកើនឡើងនោះឡើយ។ តួនាទីនៃបណ្តាញបណ្តុះបណ្តាលអេពីដេមីសាស្រ្ត ត្រូវបានទទួលស្គាល់នៅក្នុងការបង្ការ និងការប្រយុទ្ធនឹងការគំរាមកំហែងសុខភាពសាធារណៈទាំងអស់នោះ នៅជុំវិញពិភពលោក។

ឯកឧត្តមរដ្ឋមន្ត្រីបានបន្ថែមថា​ នៅចំពោះមុខកង្វល់សុខភាពសាធារណៈទាំងអស់នេះ ក្រសួង​ សុខាភិបាលនៃព្រះរាជាណាចក្រកម្ពុជាបានអភិវឌ្ឍផែនការជាតិ សំរាប់ជំងឺកើតឡើងថ្មីៗ និងគ្រោះបន្ទាន់សុខភាពសាធារណៈនានា ដើម្បីសំរេចបានសមត្ថភាពស្នូលដែលតំរូវដោយច្បាប់សុខភាពអន្តរជាតិឆ្នាំ២០០៥ តាមរយៈការអនុវត្តន៍យុទ្ធសាស្រ្តអាស៊ីប៉ាសីហ្វិក សំរាប់ជំងឺកើតឡើងថ្មីៗ។ យើងកសាងនូវសមត្ថភាពមន្ត្រីសុខាភិបាល ដែលអាចអង្កេត និងឆ្លើយតបចំពោះព្រឹត្តិការណ៍សុខភាពសាធាណៈ នៅក្នុងរវាង ២៤ម៉ោង។ ដើម្បីរំដោះនូវរបាំងប្រើប្រាស់សេវាសុខាភិបាល ក្រសួងសុខាភិបាល ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហុ៝ន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ចូលមូលនិធិសមធម៌ ការធានារ៉ាប់រងសុខភាពនៅសហគមន៍ ទីភ្នាក់ងារប្រតិបត្តិការពិសេស និងការផ្តល់ប្រាក់លើកទឹកចិត្តចំពោះឆ្មប ដើម្បីធានាថា សេវាសុខាភិបាលជាសារវ័ន្ត បានទៅដល់ប្រជាជនគ្រប់រូប ជាពិសេសជនក្រីក្រ និងជនងាយរងគ្រោះ។

គួរកត់សម្គាល់ថា​ តាំងពីឆ្នាំ២០១១ មានមន្ត្រីសុខាភិបាលប្រមាណ ២០០ នាក់បានបញ្ចប់ការសិក្សាវគ្គអេពីដេមីសាស្រ្តមូលដ្ឋានរយៈពេល៦សប្តាសហ៍ និង ២៥ នាក់បានបញ្ចប់វគ្គបណ្តុះបណ្តាលអេពីដេមីសាស្រ្តកំរិតមូលដ្ឋានរយៈពេល៦ខែ។ ក្រសួងសុខាភិបាលមានផែនការនឹងពង្រី​កវគ្គសិក្សារយៈពេល១ឆ្នាំ ដើម្បីពង្រឹងគុណភាពនៃការបណ្តុះបណ្តាល។ តាមការប៉ាន់ប្រមា​ណប្រទេសកម្ពុជា ត្រូវការអ្នកអេពីដេមីសាស្រ្តប្រមាណ ៧៥នាក់។

អ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា។